उर्लाबारी । उर्लाबारी नगरपालिकाले राष्ट्रिय योग खेलकुद प्रतियोगिताका बिजेता खेलाडीहरुलाई बिहीबार सम्मान गरेको छ ।
नेपाल योग खेलकुद संघको आयोजनामा गत फागुन १० गते काठमाडौंको टोखामा सम्पन्न छैटौँ राष्ट्रिय योग खेलकुद प्रतियोगितामा विजेता बनेका खेलाडीहरुलाई नगरपालिकाको सभाहलमा एक कार्यक्रमको आयोजना गरी सम्मान गरेको हो ।
नगर उपप्रमुख मिना खतिवडा पौडेल र प्रमुख प्रशासकीय अधिकृत अभयकुमार गुप्ताले संयुक्त रूपमा खेलाडीहरूलाई खदा, सम्मान पत्र र डायरी प्रदान गर्नुभएको छ । नगर उपप्रमुख खतिवडा पौडेलले विजेता खेलाडीहरूको मेहनत र सफलतालाई प्रशंसा गर्दै उहाँहरूको उज्जवल भविष्यको शुभकामना दिनुभएको भयो । त्यसैगरी, प्रमुख प्रशासकीय अधिकृत गुप्ताले बालगृहका बालबालिकाले योग खेलकुदमा उत्कृष्ट प्रदर्शन गरी नगरको नाम उच्च बनाएको भन्दै उहाँहरूको हौसला अभिवृद्धि गर्न निरन्तर सहयोग रहने बताउनु भयो । कार्यक्रममा नमुना बाल गृहकी अध्यक्ष मिना बरालले आर्थिक अभावका कारण अन्तर्राष्ट्रिय योग प्रतियोगितामा लैजान समस्या सिर्जना भएको बताउनुभयो । कार्यक्रम सञ्चालन नगरप्रमुखका स्वकीय सचिब हरि खतिवडाले कार्यक्रम सञ्चालन गर्नुभएको थियो । राष्ट्रिय योग खेलकुदमा विजेताहरुलाई आगामी चैत्र २६ र २७ गते मलेसियामा हुने १६ औँ अन्तर्राष्ट्रिय योग प्रतियोगितामा नेपालको प्रतिनिधित्व गर्दै सहभागी हुनेछन् । नमूना बालगृहकी स्वइच्छा थापा र किरण मगरले स्वर्ण जित्नुभएको थियो भने चाँदनी दर्जी, सुन्दर सार्की र जय चौधरीले रजत र रोशन चेम्जोङले कास्य पदक जित्नुभएको थियो ।