उर्लाबारी । साथीभाई वा विद्यार्थी, गाउँटोल, राजनीतिक पार्टीलगायत ब्यक्तिहरु मिलेर रमाइलोका लागि वनभोज अथवा पिकनिक जाने गरिन्छ । यस्ता वनभोजभन्दा अलि फरक सोचले उर्लाबारीकी ममता राना, सविता धिमाल र कर्म मगरले वनभोज कार्यक्रम आयोजना गर्नुभयो ।
उर्लाबारी–७ स्थित नमूना बाल गृहका बालबालिकाहरुका निम्ति उहाँहरुले वनभोज अथवा पिकनिकको आयोजना गर्नुभयो । इलाम र मोरङको संगम स्थल खुँडीमा वनभोज तथा खेलकुद कार्यक्रम गर्नुभएको थियो । प्रत्येक बर्ष यो टिमले नमूना बाल गृहका बालबालिकाहरुका लागि वनभोज आयोजना गर्दै आउनु भएको छ । साथीभाई मिलेर वनभोज जानु भन्दा एक दिन भएपनि नमूना बाल गृहका बालबालिकाहरुलाई रमाइलो गराउने उद्देश्यले वनभोजको आयोजना गरिएको ममता रानाको भनाई छ । उहाँले प्रत्येक बर्ष यो वनभोजलाई निरन्तरता दिइने बताउनुभयो । गृहकी अध्यक्ष मीनादेबी बरालले बालबालिकाको रमाइलोका निमित्त तीन जना मिलेर विगत ७ बर्षदेखि वनभोज कार्यक्रम गर्दै आएको बताउनुभयो । उहाँको साथ र सहयोगले बालबालिकाको मुहारमा खुशी छाएको बताउनुभयो । जसमा उर्लाबारी–७ को पशुपति आमाबिले यातायातको ब्यवस्था मिलाइदिएको छ । अन्य सम्पूर्ण खर्च तीन जनाले व्यहोर्ने गर्नुभएको छ । झापा र मोरङका अधिकांश पर्यटकीय स्थलहरुमा बाल गृहका बालबालिकाहरुलाई वनभोजका लागि लगिसकेको सहयोगी सविता धिमालले बताउनुभयो ।