उर्लाबारी, निजी तथा आवासीय विद्यालय अर्गनाइजेसन नेपाल (प्याव्सन) को ३१ औं वार्षिकोत्सव विभिन्न कार्यक्रम गरी मनाइएको छ । मोरङको उर्लाबारीमा प्याव्सन नगर समितिले शुभकामना आदानप्रदान, रक्तदान, सरसफाई र दीप प्रज्वलन गरी स्थापना दिवस मनाएको हो ।
आज बिहान श्रीसगरमाथा साकोसको सभाहलमा शुभकामना आदानप्रदान र रक्तदान कार्यक्रम सम्पन्न भयो । प्याव्सनका केन्द्रीय सदस्य लेखनाथ भट्टराईको प्रमुख आतिथ्यतामा भएको कार्यक्रममा प्रमुख अतिथि भट्टराईसहित प्याव्सनका प्रदेश १ सहसचिव केदार खनाल, मोरङ जिल्ला अध्यक्ष शितला सुब्बा, रेडक्रस उर्लाबारीका सभापति मदनबाबु प्रसाई, होटल व्यवसायी संघका अध्यक्ष मनोहरि दाहाललगायतले शुभकामना मन्तव्य राखेका थिए ।
प्याव्सन नगर समिति अध्यक्ष दिनेश पोख्रेलको सभापतित्वमा भएको कार्यक्रमका संयोजक यादप भण्डारीले सहभागीहरुलाई स्वागत गरेका थिए । सोही अवसरमा आयोजित रक्तदान कार्यक्रममा ६२ पिन्ट रगत संकलन भएको कार्यक्रम संयोजक भण्डारीले जानकारी दिए । स्थापना दिवसकै अवसरमा दिउँसो उर्लाबारी चौकको राउण्ड अवाउट वरिपरि सरसफाई तथा रंगरोगन गरिएको छ भने साँझ सोही स्थानमा दीप प्रज्वलन गरिएको अध्यक्ष दिनेश पोख्रेलले बताए ।