मिक्लाजुङ / उर्लाबारी । मिक्लाजुङ गाउँपालिका–१ रमितेबाट चिठी लेखेर हराएकी १५ बर्षीया किशोरी मृत अवस्थामा भेटिएकी छिन् ।
आफ्नै घरबाट करिब २५० मिटर पर सिन्काउलीको रुखमा झुन्डिएको अवस्थामा किशोरी कोपिला राई मृत अवस्थामा भेटिएकी हुन् । मिक्लाजुङ–१ रमिते निवासी बुवा मदन राई र आमा तिर्थ कुमारी राईकी छोरी कोपिला राई गत शनिबार दिउँसो करिब ३ बजे देखि बेपत्ता भएकी थिइन् । कोपिलाले I love you, Mom and Dad, मैले तपाईंहरूको लागि केही गर्न सकिनँ, माफ गर्नुहोस् । मेरो अन्तिम बिदाइ छ ।” भन्ने भावनात्मक चिठी लेखेर छोडेकी थिइन् । टाडी माबि कक्षा ९ मा अध्ययनरत कोपिलाको निधनले गाउँ शोकमग्न भएको छ ।
विद्यालयका प्रधानाध्यापक अमृतकुमार राईका अनुसार यो घटनाले विद्यालयस्तरमा मनोपरामर्श (काउन्सेलिङ) शिक्षकको आवश्यकता देखिएको छ । विद्यार्थीहरूको मानसिक स्वास्थ्यलाई मध्यनजर गर्दै प्रत्येक विद्यालयमा मनोपरामर्श सेवाको व्यवस्था गर्नुपर्ने विषय अहिले थप आवश्यकता बनेको उनको भनाई छ ।