उर्लाबारी । मोरङको उर्लाबारीमा रहेको एञ्जल फाउन्डेसनले आफ्नो दोस्रो वार्षिकोत्सबको अवसरमा नमूना बाल गृहका बालबालिकाहरुसँग खुशी साटेर मनाएको छ ।
मंगलबार उर्लाबारी–७ स्थित बाल गृहका बालबालिकाहरुलाई खाना खुवाउनुको साथै दैनिक सरसफाईका लागि आवश्यक पर्ने फिनेल, ह्रापिक, सर्फ, ओडोनिल, शौचालय ब्रस, सेनिटरी प्याड, नुहाउने र लुगा धुने साबुन सहयोग गरिएको हो । उर्लाबारी नगरपालिकाकी उपप्रमुख मिनाकुमारी खतिवडा पौडेलको प्रमुख आतिथ्यता एबं फाउण्डेशनकी अध्यक्ष पुनम राजवंशीको सभापतित्वमा उक्त कार्यक्रम भएको थियो । कार्यक्रममा बोल्दै उपप्रमुख पौडेलले नमूना बाल गृह देशकै नमूना भएको बताउनुभयो । सबैको साथ र सहयोगको आधारमा सञ्चालन भइरहेको बाल गृहलाई नगरपालिकाको तर्फबाट समेत बार्षिक रुपमा सहयोग गर्दै आएको उहाँले जानकारी दिनुभयो ।
कार्यक्रममा फरिष्ता क्लिनिकका बरिष्ठ अधिकृत टिकाराम अर्याल, मेडिकल अफिसर डा. विनय प्रधान, डा. बसन्त अधिकारी, ल्याब एसिस्टेन्ट कमला पौडेल, कर्मचारीहरु बिनु अधिकारी, सिता न्यौपाने, निकिता राजवंशीलगायतको सहभागिता रहेको थियो । फाउण्डेशनका प्रमुख कार्यकारी अधिकृत जयसिंह राजवंशीले दोस्रो वार्षिकोत्सबको खुशी बाल गृहका बालबालिकाहरुसँग साट्न पाउँदा खुशी लागेको बताउनुभयो । बाल गृहका कार्यालय प्रमुख जीवन घिमिरेले सहयोगीदाताहरुप्रति धन्यवाद एबं आभार प्रकट गर्नुभयो । सहयोगीदाताहरुकै भरमा बाल गृह सञ्चालन भइरहेको बताउँदै आगामी दिनमा पनि सकारात्मक सहयोगको अपेक्षा गरेको उहाँले बताउनुभयो । यस्तै, आजै बिहान बिहान उर्लाबारी–५ स्थित ब्रह्मकुमारी राजयोग सेवा केन्द्रमा ब्रह्मा भोज समेत गराइएको प्रमुख कार्यकारी अधिकृत राजवंशीले बताउनुभयो । बाल गृहमा ६८ जना बालबालिका आश्रित रहेका छन् ।