
सरोज बस्नेत
उर्लाबारी । मोरङको उर्लाबारीमा यही फागुन १५ गतेदेखि हुन लागेको उर्लाबारी कृषि, औद्योगिक तथा पर्यटन महोत्सवको तयारी तीव्र पारिएको छ ।
उर्लाबारी उद्योग वाणिज्य संघको मुख्य आयोजनामा उर्लाबारी–४ आइतबारे स्थित उर्लाबारी नगरपालिका दक्षिण क्षेत्रमा हुने उक्त महोत्सवको तयारी तीव्र पारिएको हो । उर्लाबारी बजार सौन्दर्यकरण र आगो निभाउने उपकरण रिफिल गर्ने मेसिन खरिद सहयोगार्थ हुन लागेको महोत्सवमा नेपालका घरेलु, साना, मझौला तथा ठूला उद्योगका अतिरिक्त विदेशका वस्तु र पहाडी जिल्लाका खनिजजन्य, स्थानीय कृषिजन्य र अन्य उत्पादनका स्टल रहने उर्लाबारी उद्योग वाणिज्य संघका अध्यक्ष तारामान सिरेङले जानकारी दिनुभयो । उत्पादक र उपभोक्ताबीच सुमधुरसम्बन्ध कायम गर्ने गर्दै पछिल्लो समय बजारमा देखिएको आर्थिक अस्थिरतालाई चलायमान बनाउन महोत्सव आयोजना गरिएको उहाँको भनाई छ । फागुन १५ गते महोत्सवको उद्घाटन कोशी प्रदेशका मुख्यमन्त्री हिक्मत कार्कीले गर्ने कार्यक्रम रहेको उहाँले जानकारी दिनुभयो ।
महोत्सवमा कृषिजन्य वस्तु, खाना तथा घरेलु उत्पादन, हस्तकला तथा गार्मेन्ट, फुटवेयर, अटोमोवाइल्स, इलेक्ट्रोनिक्स, फर्निचर तथा फर्निसिङ, जडीबुटी, औषधिजन्य वस्तु तथा निर्माण सामग्री राखिनेछन् । महोत्सवमा स्थानीय संस्कृति तथा मौलिक वस्तुहरुको प्रदर्शनी पनि रहने संघकी महासचिब सम्झना खतिवडाले जानकारी दिनुभयो । महोत्सवमा राष्ट्रिय तथा स्थानीय कलाकारको प्रस्तुति र बाल उद्यान तथा मनोरञ्जनात्मक खेल देखाइने उहाँले बताउनुभयो ।
महोत्सवमा १० दिनको अवधिमा ३ लाख भन्दा बढी दर्शकहरूको सहभागिता र करिब १५ करोड रुपैयाँको कारोबार हुने अपेक्षा गरिएको सदस्य दिपक कार्कीले जानकारी दिनुभयो । छिमेकी नगरपालिका तथा गाउँपालिका, विभिन्न संघसंस्था, नेपाल उद्योग वाणिज्य महासंघ, नेपाल उद्योग वाणिज्य महासंघ कोशी प्रदेश आयोजक रहेका छन् भने मुख्य प्रायोजक आइजोन इन्टरनेट रहेको छ । महोत्सवमा विक्री तथा प्रदर्शनीमा रहने वस्तुहरुको बीमा, २४ घण्टा सुरक्षा व्यवस्था, महोत्सव स्थलभित्र इन्टरनेट सुविधा, समूहका लागि सःशुल्क प्याकेज टुरको ब्यवस्था, उत्कृष्ट स्टललाई सम्मान तथा पुरस्कारको समेत ब्यवस्था मिलाइएको आयोजकले जनाएको छ ।
स्थानीय व्यापार व्यवसायलाई चलयमान बनाउने, स्थानीय प्रथम नागरिक धिमाललगायतका आदिबासीहरुको सांस्कृतिक प्रदर्शनी एबं संरक्षण, स्वदेशी सेवा, वस्तु तथा उत्पादनहरुको विक्री तथा प्रदर्शनी, स्वदेशी वस्तु तथा उत्पादनहरुको गुणस्तर तथा औचित्व सम्बन्धी जानकारी गराउने, दुई पक्षीय तथा बहुपक्षीय गोष्ठी तथा सेमिनार सञ्चालन, कृषि तथा घरेलु उत्पादनहरुको अन्तर्राष्ट्रिय स्तरमा समेत विक्री एबं प्रवर्धनका लागि बजार पहिचान गर्ने, स्वदेशमा आर्थिक गतिशिल एबं निर्यातमा बृद्धि गराउने, कोशी प्रदेशमा रहेका पर्यटकीय स्थलहरुको विकास तथा प्रवर्धनमा जोड दिने, उद्यमी, व्यवसायी र उपभोक्ताबीच प्रत्यक्ष अन्तरक्रिया गराउने, छिमेकी राष्ट्रसँगको ब्यापार विस्तारमा सहजीकरण गर्दै निर्यात योग्य वस्तुहरुको पहिचान गराउने उद्देश्य रहेको महोत्सव कार्यसम्पादन समितिका संयोजक तथा संघका पूर्वअध्यक्ष चन्द्रबहादुर भट्टराई भरतले जानकारी दिनुभयो । लोप हुँदै काठे पिङसमेत महोत्सवमा राखिने आयोजकले जनाएको छ ।