उर्लाबारी । उर्लाबारी–७ स्थित लालीगुराँस इङ्लिस बोर्डिङ स्कुलले फुड फेस्टिभल तथा सांस्कृतिक कार्यक्रम गरेको छ ।
विद्यालय प्राङ्गणमा शनिबार फुड फेस्टिभल तथा सांस्कृतिक कार्यक्रम आयोजना गरिएको हो । विद्यार्थीले बनाएका विभिन्न परिकार प्रदर्शनीमा राखिएको थियो भने बिद्यार्थीले सांस्कृतिक कार्यक्रम समेत गरेका थिए । कक्षागत पढाईसगैं ब्यवहारिक ज्ञानमा जोड दिँदै विद्यालयले उक्त कार्यक्रम गरेको प्रिन्सिपल श्याम बस्नेतले जानकारी दिनुभयो । विद्यालयले हरेक वर्ष विद्यार्थी अन्र्तनिहित प्रतिभा तथा क्षमता प्रस्फुटन गराउन यसखाले रचनात्मक कार्य गर्दै आएको उहाँको भनाई छ ।
फुड फेस्टिभलबाट विद्यार्थीले कुन परिकार कसरी पकाईन्छ, त्यसमा प्रयोग हुने सामाग्री लगायतका ब्यवहारिक ज्ञान समेत पाएको विद्यालयका सञ्चालक राजेश महेश्वरीले बताउनुभयो । उहाँले भन्नुभयो– ‘यस किसिमको रचनात्मक क्रियाकलापमा विद्यार्थीहरुले बढी ध्यान दिन्छन् ।’ विद्यार्थीलाई शैक्षिक र अतिरिक्त क्रियाकलापमा सक्रिय गराउँदै असल नागरिक निर्माण गर्ने उद्देश्य लिएको महेश्वरी बताउनुहुन्छ । अनुभवी शिक्षक शिक्षिकाको टिमले विद्यार्थीलाई सिर्जनात्मक बनाउने, स्थानीय स्रोत साधनको अधिकतम प्रयोग गरी शिक्षण गर्दै आएको उहाँको भनाई छ । सञ्चालक महेश्वरीका अनुसार उर्लाबारी–७ मै विद्यालयको सुविधासम्पन्न भवन निर्माण अन्तिम चरणमा पुगेको छ ।
४ करोड लागतमा २४ कोठाको तीन तले भवन निर्माण अन्तिम चरणमा पुगेको र २०८२ को नयाँ शैक्षिक सत्रबाट नयाँ भवनबाट कक्षा सञ्चालन गर्ने तयारी भइरहेको उहाँले जानकारी दिनुभयो । ८ कट्ठा क्षेत्रफलमा निर्मित भवन चाँडै सम्पन्न हुने तरखरमा रहेको उहाँले बताउनुभयो । कार्यक्रममा उर्लाबारी नगरपालिकाका युवा, खेलकुद तथा शिक्षा शाखाका प्रमुख शालिग्राम काफ्लेको प्रमुख आतिथ्यतामा उक्त कार्यक्रम भएको थियो । प्रमुख काफ्लेले विद्यार्थीहरुलाई पाठ्यक्रमको पढाईसँगै व्यवहारिक ज्ञानको समेत आवश्यक हुने बताउनुभयो ।
उहाँले विद्यार्थीले कक्षा कोठामा सिकेको सीपलाई व्यवहारमा उतार्दै उत्पादन र मार्केटिङ सीपको विकास गर्ने उद्देश्यले आयोजना गरिएको फुड फेस्टिभलले ब्यवसायी वा स्वरोजगार बन्न प्रेरित गरेको बताउनुभयो । उक्त कार्यक्रममा विद्यार्थीहरुले आकर्षक नृत्य प्रस्तुत गरेका थिए । सो फेस्टिबलमा पकाईएको सामाग्री तथा खानेकुरा विद्यार्थी स्टलमार्फत विक्री समेत गरेका थिए । स्कुलका संस्थापक अमर धिमाल, अभिभावक प्रभु राईलगायतले बोल्नुभएको थियो । कार्यक्रम सञ्चालन विद्यार्थीहरु आकृति बराल र सुदर्शन थापाले गर्नुभएको थियो ।
