उर्लाबारी । मोरङको उर्लाबारी–७ का २५ बर्षीय योगेश बस्नेतले राजनीतिक क्षेत्रमा आफुलाई अब्बल सावित गरेका छन् ।
युवा संघ नेपालबाट राजनीति सुरु गरेका बस्नेतले अहिले नेपाल कम्यूनिष्ट पार्टी (नेकपा) उर्लाबारी वडा नं. ७ शाखा कमिटीको सह–संयोजकको जिम्मेवारी सम्हालिरहेका छन् भने राष्ट्रिय युवा संघ नेपाल उर्लाबारी नगरकमिटीको पनि सह–संयोजक भएर काम गरिरहेका छन् । युवा परिचालन, राजनीतिक योजना निर्माणलगायतमा बस्नेतलाई अब्बल मानिन्छ । उनी प्रतिनिधिसभा र प्रदेशसभाको निर्वाचनमा तत्कालिन एमाले र माओबादीको एकतामा बनेको बाम गठबन्धनका उम्मेद्वारलाई जिताउन युवा मोर्चामार्फत परिचालित भएका थिए । राजनीतिलाई सेवाको रुपमा लिने बस्नेत सामाजिक सेवाका काममा पनि उत्तिकै सक्रिय छन् । राष्ट्रिय युवा संघको माध्यमबाट पनि उर्लाबारी क्षेत्रमा विविध कार्यक्रम सञ्चालनमा उनले नेतृत्वदायी भूमिका निर्वाह गर्दै आएका छन् । उनको अध्यक्षमा रहेको एच नेपालय फाउण्डेनबाट पनि सामाजिक सेवाका काम गर्दै आएका छन् । ‘नेपालका हरेक राजनीतिक आन्दोलन र परिवर्तनको इतिहासलाई हेर्ने हो भने अग्रपंक्तिमा देखिन्छ युवाहरुको भूमिका’ उनले भने–‘तर, युवाहरुलाई अवसरमा भने उपेक्षा गरिँदै आएको छ ।’
युवाहरुलाई राजनीतिमा प्रयोगमात्र गर्ने प्रवृत्ति ब्यापक रहेकाले अबको नेतृत्वमा युवाहरु अग्रभागमा सरिक भएर काम गर्नु पर्ने अवस्था आएको उनको अनुभव छ । ‘नेताको वरिपरि घुम्ने र चाकडी चाप्लुसी गर्ने व्यक्तिले जिम्मेवारी पाउने होइन कि क्षमताका आधारमा जिम्मेवारी दिने संस्कारको विकास गर्न जरुरी छ’ उनले भने–‘जसबाट युवालाई राजनीतिमा सकारात्मक दृष्टिकोण बनाउन सहयोग पुग्छ ।’